12 Mei: “Ahu do Dalan in”

tnt_mei12_jesusdalan.jpg

Ahu do dalan in …… Seng dong na das hubani Bapa in, anggo seng marhiteihon Ahu”.

(Johannes 14:6)

Na laho misir do hita hun dunia on, pangarapanta laho hu surga do hita hubani hasangapon. Ibere Naibata do banta goluh i tanoh on ase ipasirsir banta goluh magira i nagoriatas.

Sonaha do ibahen pasirsirhon ai banta pakon dalanta hujai? Ibahen do hita mangihutkon-Si. Ai boi do hita pardousa itampin Naibata? Boi do hita gabe niombahNi? Boi do ai marhitei Tuhan Jesus Anak ni Naibata, Sipaluah hita.

Na matei do Ia (Jesus) halani dousanta, sedo pitah halani dousanta dihut do halani dousa ni dunia on. Bani parmateini pakon parpuho-Ni iungkab do labah ni surga (nagoriatas). Barang ise na roh, marhitei goran-Ni masuk nari ma hujai.

Ra manungkun uhurmu: Sonaha ma parmasukku hujai ? Pungkah ham ma martonggo. Atap isungkun uhurmu use: Ai ra do Naibata manangihon tonggongku ahu pardousa do, Ia na pansing?

Halani Tuhan Jesus ra do Naibata manangihon. Sonaha ma partonggongku? Atap sonai nimu. Pajojor ham ma hu Bani hampung ni uhurmu pakon haganup dousamu. Sonon ma tonggomu: “Ham Bapa sasap Ham ma dousangku haganupan. Urupi Ham ma ahu use porsaya ahu humbani gok ni uhurhu hu Bamu pakon bani AnakMu Tuhan Jesus Kristus. Urupi Ham ma ahu ase magigi ahu bani dousangku! Amen.”

Ra do Naibata manasap ganup dousamu janah ibere bamu gogoh mangkaporsayai Tuhan Jesus Sipaluah ai. Ai Jesus do dalan hubani Naibata, marhiteihonsi boi ham gabe anak (boru) ni Naibata.

Jesus do dalan ai. Sagala dalan tinombei ni jolma dompak Naibata, lepak do ai. Ai irontos dalan dompak Naibata, hape seng ongga ia humbani Naibata, tontu pelet ma tinembak ni dalan ai lang dompak Naibata be. Tapi Tuhan Jesus na roh humbani Naibata janah na mulak hubani Naibata, sintong ma dalanta mangihutkon-Si, das ma hita bani Naibata.

Tonggo

Ham Tuhan Naibata! Tarima kasih ma Bamu; halani idop ni uhur-Mu. Urupi Ham ma ase porsaya botul ahu na dob matei Tuhan Jesus halani dousangku.

Amen.

Doding

Haleluya No. 107: 1,7: Irikkon Nasiam ma Au >>

1. Irikkon nasiam ma Au, nai hatani Tuhanta
Sai parnalang ma dirimu, hatangku malah harga
Sai mambur bahenlah ganup, parlahoumin na so talup

7. Marmogah-mogah hita bei, lao mangihutkon Jesus.
dagingta ‘ge tonduyta per tulakhon lah bai Jesus;
Ai na mangengkar Tuhan in, seng dapot hasonangan in.