Jaga ma hanima anjaha martonggo ase ulang hanima hona parlajoan!
(Mateus 26:41)
In ma hata sipaingat ni Tuhan Jesus bani susianni bani borngin parpudi sanggah rap sidea. Ibotoh Tuhan Jesus, dob sirang sidea paima-imahon do parlajoan ai bani sidea. lbotoh Tuhanta do das do holi bani na mamorsou dirini Tuhan Jesus, seng itanda sidea Ia.
Iboan do sidea tolu halak namin laho hu pohon Getsemane. Ujungni ganup do sidea manadingkon Tuhan Jesus. Sahalak humbani sidea mamorsou Tuhan Jesus, pala tolu hali mangkatahon: “Sabonar seng hutanda halak ai”, pala ibijahon.
Hu banta pe sonari roh do sipaingat ni Tuhanta: “Jaga ma hanima janah martonggo ase ulang hanima hona parlajoan”! Jaga ma hita rap pakon Tuhan Jesus. Ingat hita ma paruntolonni i pohon Getsemane. Ingatonta ma sitarononni das bani parmateini bani hayu parsilang, ningon idalankon holongni na banggal ai ibanta, ai ma manjuljul hita jaga janah martonggo hu Bani.
Uhur na sonai ai do homa manirang uhurta humbani dousa, mardingat holongni ai ma ase lang ra hita mamorsou Tuhanta, age pe roh dunia on mangkagigihon hita na porsaya bani pangkopkop-Ni.
Anggo roh parlajoan banta janah laho mardousa hita, ingat hita ma holong-Ni ai pakon sitaronon-Ni ai mangkopkop hita. Ai ma paputus uhurta mangkatahon: Sabonar seng ahu ra mamorsou Tuhanku.
Tonggo
Ham Tuhan Jesus! Pagolpa Ham ma ahu mardingat holong ni atei-Mu na so marsibar in, sitaronon-Mu ronsi das hu hamatean na so ingkat salah-Mu, halani hanami.
Amen.
Doding
Haleluya No. 108: 6,12. Sanggah Holong Tong Tuhanta >>
6. Sai martonggo ulang holang, ase tambah gogohmin,
Janah sai tongtong ho sirang humbai ganup munsuhmin.
12. Dirimin do munsuhnima pakon sipangagou in.
Anggo hagoluhannima, in ma Tuhan Jesus in.
Recent Comments