12 Juli: Pambalason

“Tapi Ahu mangkatahon bannima: ulang imbang na jahat, anggo dong na manompas huyummu siamun, tarehon homa hujummu sambilou.”

(Mateus 5: 39)

Anggo nabasa humbani titah na binere ni Si Musa (2 Musa: 21 – 24). Mata gantih ni mata, ipon gantih ni ipon, tangan gantih ni tangan, nahei gantih ni nahei ps. Idalankon halak Jahudi do in ibagas goluhni ronsi panorang Tuhan Jesus. Seng ibotoh sidea titah na baru: Ningon haholonganmu hasomanmu songon dirimu sandiri. Lang ibotoh sidea haholongon do na mangatasi titah.

Sedo pitah halak Jahudi, age jolma sonari on, lupa do bani titah haholongon ai, lupa jolma bani titah raja na paduahon ai “Doskon dirimu bahen hasomanmu.”

Rumbak ni holong ai (prinsipni) sedo pitah na parah atap na banggal-banggal hansa ai, age pasal na etek ningon dalanonkon do bani samah-samah diri: atap itulduk, itompas atap ipikul hasoman diri, seng paulakon sonai. Anggo porlu baloson ninuhur ni Naibata, la ma mambotohsi, timbangan ni Naibata do sintongan ase timbanganta. Podah ni Tuhan Jesus ai sedo pitah ipodahkon, tapi iparlahouhon do. Mangga*) ma sanggah tarpaku Ia janah gantung bani hayu parsilang, itonggohon do ganup sidea na mamunuh-Si, “ai seng ibotoh binahenni ai,” nini.

Hita pe anggo dong na mandorun sabar ma hita, bani Naibata do hansa patugahon. “Bangku do pambaloson Ahu do mambaloskon,” nini Tuhan in.  Botohan do Naibata aha sibahenon-Ni banta pakon bani hasoman. Taluhon hita ma na jahat marhitei na madear.

Holong do sada sinjata sigogohan mantaluhon na jahat. Halani ai pakei hita ma ai dompak imbang-imbangta.

Tonggo

Ham Tuhan Naibata! Suan Ham ma holong na humba-Mu hubagas uhurnami, bere Ham bannami Tonduy panasapon ham pipot ni hasoman ibagas holong na hun Bamu.

Amen.

Doding

Haleluya No 200 : 1, 2: Aha ma Dodingkononku >>

1. Aha ma dodingkononku ase pujionku Ham.
Ale Tuhan Naibatangku Ham ma mangurupi au.
Seng na tarpajojor ahu holong-Mu tongtong hu bangku.
Halaniin hupuji do ham marribu hali lo.

2. Sai puhoi Ham uhurhu, mandodingkong gogoh-Mu.
Ampa idop ni uhur-Mu, ronsi halayakon-Mu;
Ai sonai do isaksihon tonduy pakon pamatangku.
Halaniin hupuji do ham marribu hali lo.

*) Mangga = gari, meskipun