Usih do Harajaon nagoriatas ai hubani ragi (namigar) na binuat ni sada parinangon, iaguhon bani tolu tumba nitak paima migar ganupan.
(Mateus 13: 33)
Harajaon ni Naibata, ai ma pardomuan ni Naibata Raja pakon hita na porsaya nirajaan-Ni. Iakuhon uhurta Naibata do Raja sisungkunon ibagas goluhta. la ma mamarentah mangkuasai goluhta.
Otik do lobei ai masuk hubagas uhurta, songon nitak ai iaguhon hubagas uhurta. Dob tardidi hita marhoja ma hatani ni Naibata, marhorja ma Tonduy ni Naibata ibagas uhurta. Lambin irajai ma uhurta, rosuhta, hatanta pakon parlahouta.
Sonai ma lambin markuasa hagogohon na hum babou ai manrajai ibagas uhurta. Masuk ma harajaon ni Naibata hubagas uhurta.
Anggo iahap uhurta ma Naibata manrajai uhurta, lambin lang be margogoh uhur sapari ai ibagas dirinta, lambin merung ma sagala uhur dousa, tarpisat ibahen kuasa na humbabou ai, dobni matei ma ai, seng dong golleni be mangatur hita. Jadi lambin romban ma uhurta, pingkiranta, goluhta bani harosuh ni Naibata.
Sonai ma na masuk bani limbaga omei ai sipamasukon hu tuangan ni Naibata. Parubahan na sonai ai sedo binahenta, binahen ni Naibata do. Pindoonta ma bani Naibata: Sai roh ma Harajaonmu hubagas uhurhu, Ham Naibata Rajangku!
Dob lambin banggal pangahap na madear ai lambin marosuh ma ham mangkorjahon horja ibagas harajaon ni Naibata. Marosuh ma ham bani horja ibagas kuria ni Tuhan Jesus. Ringgas ma ham mantonggohon, ringgas ma ham manumpaki, lambin malas ma uhurta bani horja pangarahon, pararatkon, harajaon ni Naibata.
Tonggo
Ham Tuhan Naibata Bapanami na i nagoriatas! Sai paroh ham ma harajaonmu hubagas uhurnami. Paroh Ham ma harajaonmu bani ganup bangsanami.
Amen.
Doding
Haleluya No. 141: 1, 2. Jesus Raja ni Kuria >>
1. Jesus, Raja ni Kuria, na pansing janah porsaya.
Pasu-pasu Ham au on.
Sai papuho Ham uhurhu, mangirikkon Ham Rajangku,
Pargogohi Ham au tong, pargogohi Ham au tong.
2. Tonduy Napansing ma here,
roh bai uhur ni kuria bai ganup dunia on.
Ase tong sada uhurni, gembit merap pe halakni.
Pasangapkon Ham tongtong, pasangapkon Ham tongtong.
13 Februari: Mase ipaturut Naibata na porsaya itongah-tongah ni na so porsaya in? >>
Recent Comments