12 Desember: Sitean Harajaon ni Naibata

tnt_des12__1kor6_9.jpg

Ai lang ibotoh nasiam, na so sitean Harajaon ni Naibata do halak pargeduk?

(1 Korintus 6: 9a)

Seng masuk hu harajaon ni Naibata sagala pargeduk. Dob matei ia, seng masuk hu surga. Mangarap do ham masuk hu Nagoriatas dob marujung goluhmu i tanoh on? Ra do homa lang ope ipingkiri ham das hujai. Atap mabiar ham bani balosni ai?

Hata ni Naibata do na mangurupi hita mambere balos pasal sungkun-sungkun ai, sambat ni ayat na iatas in, ayat 10 ihatahon do: “Ulang nasiam kahou, seng sitean harajaon ni Naibata sagala na mabutak, sisombah gana-gana, parbangkis, pamorus-morus pakon na marjolmahon dalahi, panangko, paruhur haut, parmabuk, panrisa pakon panipu”.

Sonaha mando langkahta? Sayop na gakni masuk hita hu harajaon ni Naibata, tene?

Ulang sonai nimu, ai bani ayat 11 sambat ni ayat ai ihatahon do: “Sisonai ai do nasiam sapari. Tapi domma nasiam iburihi, domma ipapansing marhitei goran ni Tuhan Jesus Kristus ampa marhitei Tonduy ni Naibatanta”. Ase on ma balosta: Tongon do anggo pargeduk seng boi masuk hu harajaon ni Naibata. Tapi parpintor na dob ipintori daroh ni Tuhan Jesus Kristus, ai boi ma masuk hu harajaon ni Naibata.

Anggo domma torang ibotoh hita sonai, roh ma hita hubani Naibata marhitei Tuhan Jesus Kristus mamboan haganup dousanta, mansopotkon ai, ase iburihi hita marhitei daroh ni Tuhan Jesus Kristus, gabe pintor ma hita pargeduk hinan. Na so boi hinan masuk hu harajaon ni Naibata. Gabe sitean harajaon ni Naibata ma hita. Sonari domma jalon ham manean harajaon Nagoriatas ai. Warganegara surga ma hita dobdob paima partalar ni Tuhan Jesus mangalop hita haganupan atap mangalop marsasahalak.

Ase seng sundat be hita hu surga halani hagedukonta. Tapi sundat do hita hu surga anggo lang porsaya hita bani partobuson ni Tuhan Jesus na managang hapintoranta. Pargeduk seng boi hu surga, parpintor do.

Tonggo

Ham Tuhan Naibata. Bapanami! BapanaMi do Ham niombahMu do hanami sipanean harajaonMu. Patotap Ham ma hanami roh Bamu. Amen.

Doding

Haleluya No. 176: 1,3: Girah do Roh Ajalhu >>

1. Girah do roh ajalhu, lao masuk hu rumahku, hu hasonangan in.
Ganup amang inang-ku, seng bulih tangisanmu,
Au na marayak surga in.

3. Na dong ibere Tuhan madokah au marsaran ipartangisan on.
Ai anggo matei diri, bai haposoon diri,
malas ni uhur in tongtong

13 Desember: Mangahapkon Hasombuhon ni Tonduy >>

<< 11 Desember: Monang Manlawan Diri