11 Mei: Malas ni Uhur Namanorus

Ise pe lang boi be mambuat malas ni uhur ai humbannima”.

(Johannes 16 : 22)

Buei do sibere-bere ni Naibata na boi mambaheh malas uhurta. Ibere banta orangtua, niombah, hajorgiton, arta, habotohon. Tapi haganupan boi misir, magou. Jadi magou ma homa malas ni uhur pasal ai. Anggo boritan hita, anggo mangabaru hita, anggo matean hita atap rugi tiga-tiga, lopas humbani horja, lintun ma malas ni uhur, gantih ma homa malas ni uhur pasal ai. Anggo boritan hita, anggo roh ma pusok ni uhur. Ai haganupan parsatongkinan do sedo na totap ai i tanoh on. Jadi margantih-gantih ma pusok ni uhur ampa malas ni uhur mamontas hubagas uhurta.

Tapi dong do sada malas ni uhur na so boi buaton ni age ise humbagas uhurta. Ai ma malas ni uhur bani hatuahon hinorhon ni parpuho ni Tuhan Jesus Kristus humbani na matei dob ibontas sitaronon na parngit tumang ronsi matei tarsilang. Ai ma malas ni uhur ni anak ni Naibata na binere ni Bapanta na i nagoriatas ai bani hita hinaholonganni. Ipatorang Tonduy na Pansing ai ma ai hubagas uhurta, ai ma mangojur hita mangidangi (mambalosi) Naibata ibagas goluhta ari-ari.

Masuk do ham bani malas ni uhur na manorus on? Anggo sonai rapat ma ham bani Naibata, martambah-tambah ma homa malas ni uhurmu, ai lambin itanda ham ma Naibata tangkas.

Anggo lape itanda ham malas ni uhur na samasam on, huhatahon ma bamu marhitei goran ni Tuhan Jesus: Pindahi ham ma malas ni uhur ibagas Tuhan Jesus Kristus. Roh ma ham bani Naibata pakon Sipaluah in, pindo ham ma ase roh Ia hu bamu gabe manggoluh tonduymu ibagas malas ni uhur.

Malas ni uhur pangkorhon ni haporsayaon bani pangkopkop ni Tuhan Jesus Kristus banta, ai ma malas ni uhur na so itanda dunia on ope. Tapi ham porlu tandaonmu ai, ase dapot ham malas ni uhur na manongtong ai.

Tonggo

Ham Tuhan Jesus! Bahen Ham ma ase huahap holong ni ateiMu bangku. Na matei Ham janah mulak manggoluh gabe hagoluhanku.

Amen.

Doding

Haleluya No. 68 :1-3: Hatuahon do, Hamegahon do >>

1. Hatuahon do, hamegahon do parpuhoni Tuhanta in.
Roh Sipagoluh bani pardosa, megah-megah ma uhurta in
Roh Sipagoluh bani pardousa, megah-megah ma uhurta in.

2. Hatuahon do, hamegahon do parpuhoni Tuhanta in.
Monang do Jesus, talu sibolis, megah-megah ma uhurta in
Monang do Jesus, talu sibolis, megah-megah ma uhurta in.

3. Hatuahon do, hamegahon do parpuhoni Tuhanta in
Mungkap do dalan hu hagoluhan, megah-megah ma uhurta in
Mungkap do dalan hu hagoluhan, megah-megah ma uhurta in.