“Ambah ni ai age hita pe na dob manjalo limbuah ni Tonduy ai holsohan do ibagas uhurta paima-imahon hita ipahaanak, ai ma haluahon ni pamatangta”.
(Roma 8:23)
Bagei do dalan ni ase masihol uhur bani na roh dearni. Roh dearni namin rumah diri, ulang namin roh pusok ni uhur, sitaronon, jut ni uhur. Maruntol bei do hita pasal ai.
Tapi aha do gunani?
Sai roh do ari na jahat banta. Seng boi tulakonta. Mangarap do hita bani sidearan, na so dong be namin sitaronon ampa pusok ni uhur, na so dong be dousa.
Dong do ianan na sonai.
Tapi sonaha do dalan hujai ase boi hita masuk bani ianan ai? Ase bani sada ari tading ai namin haganupan.
Dong do na mangarapkon hasonangan gabe iarsik-arsik dirini i tanoh on use dapotsi ninuhurni hasonangan magira ai.
Anggo ai do onjolan ni haposayaonta, hiranan ma hita, seng dapot ai, ai pingkiran ni jolma do onjolanni.
Aha do onjolan ni haporsayaonta pakon pangarapanta? Barang ise na mambere uhurni ianan ni Tonduy na Pansing botohonni ma aha onjolan ni haporsayaonni pakon pangarapanni bani goluh na sadokah ni dokahni ai, ai ma bani Jesus na dob puho humbani na matei, mangarap bani parpuhoon magira ai, mangarap bani goluh na sadokah ni dokahni i lambung ni Naibata.
Tonduy ai na dob mamungkah horjani ibagas uhurta dobkonnni do ai das bani na maluah botul hita humbani dousa.
Domma ipungkah Tonduy ai horjani ibagas uhurmu? Domma ibalosi ham Tonduy ai?
Balosi ham ma Tonduy ai ase itopa ham bani pangarapan na manggoluh. Pindo ham ma ase ibobai Tonduy ai ham bani pangarapan na manggoluh.
Tonggo
Ham Tuhan Naibata! Porlu tumang, do bannami TonduyMu ase ibobai hanami bani pangarapan na sintong, pangarapan na manggoluh.
Amen.
Doding
Haleluya No. 198 :1,2: Ale Tuhan Bapanami >>
1. Ale Tuhan Bapanami na marholong atei in;
Sai pasorap Ham bannami Tonduymu Napansing in.
Tonggor au, tonggor au Tonduy-Mu sai bere au.2. Sai palongkot bai uhurhu Tonduymu Napansing in.
Sai pabayu ma uhurhu, saloseihon dousangkin.
Ingat au, ingat au, Tonduy-Mu sai bere au!
Recent Comments