Pasupasuon-Ni ma ho ibagas huta, pasu-pasuon-Ni ma ho i talun, pasupasuon-Ni maho laho haluar pakon laho masuk. (5 Musa 28: 3, 6)
Ipairik-irikkon pangkawah ni Naibata do siminikni dompak ja pe atap ija pe. I huta, i darat ni huta (i juma, i pongkalan, atap ija pe). Mardalan laho haluar, mardalan laho masuk, laho mulak, tong do ididah Naibata.
Mase sonai? Sihol pasupasuonni hita, Sihol irik pasu-pasu-Ni mangirik-irik hita ninuhur-Ni. Asal idingat janah ihaporsayai hita gelah hata ai domma gabe pasupasu ai banta. Mase? Ai mabiar ma hita mangkorjahon dousa anggo ididah Naibata do. Laho manangko gan panangko ikawahi do inggot atap dong na mangidah, tapi seng ikawahkon hu atas atap ididah Naibata. Anggo ikawahkon gan hu atas atap ididah Naibata sundat do na manangko ai.
Anggo idingat hita na iirik-irik pangkawah ni Naibata do hita, mabiar ma hita mangkorjahon dousa. Jadi gabe halak na madear ma hita: paramangon na madear, parinangon na madear, garama na madear, anakboru na na madear, dakdanak na madear ma hita.
Tapi anggo lupa hita na ipaidah-idiah Naibata do hita, ijai ma roh uhur jahat na marhageibagei ai. Dob mardousa hita magou ma hasonanganta, magou ma malas ni uhurta.
Ai ma ase porlu idingat hita dohor do Naibata ilambungta, ija pe hita, i darat, i laut atap i awang-awang (udara) ibagas huta atap i darat ni huta ihasomani Naibata do hita janah sirsir do Ia mamasu-masu horjanta. Anggo sonai hinsah ma uhurta mamontas dunia on.
Ham Tuhan Naibata, Tarima kasih ma Bamu, ai ihasomani ham do hanami anjaha ipasupasu Ham ari-ari. Amen.
Haleluya No. 7: 4, 7: Porini Dong Marribu Hali >>
4. Tarima kasih ma uhurhu, Bamu o Naibata tongtong;
Ibahen dearni layak-Mu, binere-Mu hubangku on;
Ai ipatudu Ham tongtong ganup na porlu bangku on.
7. Ai ise do mamasu-masu, au on o Naibata, lang Ham?
Pamatang rap pakon tonduyhu, sai iparmudu-mudu Ham
Jaha lumbang uhur-Mu in mangidah pardousaonkin.
Recent Comments