Tapi anggo siparmaloi ai ma Tonduy Na Pansing, sisuruhon ni Bapa marhiteihon goranku, ajaronkon janah pagolpaon ni ai do hu bennima sagala na Huhatahon in hu bennima.
(Johannes 14:26)
Roh do Tonduy na Pansing hubagas uhur ni susian in patubuh uhur hasaksian pasal parmatei pakon parpuho ni Tuhan Jesus.
Dob roh Tonduy ai mulgap ma bani pardingatan ni sidea sagala na hinatahon ni Tuhan Jesus hinan bani sidea janah lambin iarusi na so niarusan ni sidea hinan hata-Ni, panmatei-Ni ronsi parpuho-Ni.
Ra do homa Tonduy na Pansing ai marhorja ibagas uhurta, patorangkon banta pasal hata ni Naibata, pasal parmatei ni Tuhan Jesus ronsi parpuhoni ampa artini ai bani haluahonta.
Tapi maningon tagangonta do kamar ibagas uhurta bahen ianan ni Tonduy ai. Anggo sihol topaon-Ni hita songon susian naijia, ulang ilawan hita Tonduy ai, gabe marrupei ma hita bani Tuhan Jesus.
Maningon jaloonta do tonduy pakon uhur na bayu, maningon gabe jolma na baru do hita homa. Tonduy ai do na hoi mangkorjahon ai ibagas uhurta.
Aha do pardomuanmu pakon Kristus? Domma itangkap uhurmu Tuhan Jesus? Domma totap haporsayaonmu bani parmatei-Ni pakon parpuho-Ni. Domma iahap ham na dob margalar utang dousamu marhiteihon Tuhan Jesus?
Ningon gomos do pindoonta, ase lambin ipatalar tonduy ai Tuhan Jesus banta haluahon pakon hagoluhanta.
Tonduy na Pansing ai do marhorja ase lambin torang banta hata pakon bagah-bagah ni Naibata. Ia do pagolpahon hata ni Naibata na dob ginuruhonta. Halani ai ma ase porlu tumang pindoonta tong Tonduy na Pansing ai.
Tonggo
Ham Tuhan Naibata: Suruh Ham ma Tonduy-Mu na Pansing in bangku, hubere pe iananni ibagas uhurhu. Ase marhorja Ia ibagas diringku pabayu uhurhu.
Amen.
Doding
Haleluya No. 83 : 2-4: Roh ma Ham, Tonduy Na Pansing >>
2. Bere Ham bai uhurnami hapentaran hun Bamu.
Ase ibotoh hanami marpangabak hu Bamu;
Humbai hakahouon pe Ham ma paluahkon bei.3. Patuduhkon Ham bannami dalan hagoluhan in;
Sai pabayu uhurnami, sai padaoh dousa in.
Sai pagogoh au tongtong bani na madear on.4. Pabotohkon Ham bannami na niambilankon-Mu:
Naibata do Bapanami, hanai on do anak-Nin.
Daroh niuseihon in, do ondolan lao hujin.
Recent Comments