1 Juli: Sonaha do Holongta?

“Nasiam dakdanakku, ulang ma hatanta pakon dilahta mangkaholongi, tapi marhitei pambahenan ma ampa hasintongan.”

(1 Johannes 3 :18)

Haholongon sedo ai ibagas hata hansa: Haholongon ai ma ibagas horja pakon pangidangion (pelayanan). Na taridah do holong ai marhitei horja dompak na legan. Ibagas ai do na marnalang diri ase mamboan pasu-pasu bani na legan.

Arusanta do ai torang anggo ipingkir hita holong ni Tuhan Jesus. Goluh ni Tuhanta ma gambaran ni holong na sintong ai. Seng ipingkirhon dirini, sai ipindahi do na madear dompak hasoman. Daoh do legan ni holong ni Tuhan Jesus ase holong ni hita jolma. Dong tongon orangtua na holong tumang uhurni bani niombahni, tapi ipareksa ope atap sonaha holongni niombahni ai dompaksi. Seng sonai anggo holong ni Tuhan Jesus, holong na borsih do.

Holong ni Tuhan Jesus sedo sonon: Holong do uhurhu bani bapa ampa inang ampa botouhu ai ipatorsa-torsa sidea ronsi boritan. Ase, sedo marguru hubani pambahenan ase ihaholongi Tuhan Jesus hita. Marulak-ulak do atap piga hali sihol boanonni hita hu hamubahon ni uhur ampa hubani haporsayaon.

Sonaha do holongta? Anggo dong na marhasunsahan dohor atap daoh sonaha do ninta? “Aha dong pardomuanni ai banta? Otik pe seng roh uhurta laho manolong atap roh hita mangurupi. Seng holong ateita bani sidea. Anggo dong huanta, ibahen hita na madear bani hape seng idingat, surut ma huanta. Sedo ai holong na botul. Sedo hatanta atap dilahta mangkaholongi, marhitei pambahenan do ibagas hasintongan.

Tonggo

Ham Tuhan Jesus! Holong na marpangkaut do holongnami. Urupi Ham ma hanami ase ulang singgan hata pakon dilah hansa holongnami. Tapi marhitei pambahenan ma ibagas hasintongan.

Amen.

Doding

Haleluya No 200: 1, 2 Aha ma Dodingkononku >>

1. Aha ma dodingkononku ase pujionku Ham.
Ale Tuhan Naibatangku Ham ma mangurupi au.
Seng na tarpajojor ahu holong-Mu tongtong hu bangku.
Halaniin hupuji do ham marribu hali lo.

2. Sai puhoi Ham uhurhu, mandodingkong gogoh-Mu.
Ampa idop ni uhur-Mu, ronsi halayakon-Mu;
Ai sonai do isaksihon tonduy pakon pamatangku.
Halaniin hupuji do ham marribu hali lo.